Club-Vögel
Herzogenauracher Geschichten 224
„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also, die Gschicht, die wu ich eich heit derzell, is nedd direggd vo mein Freind Heiner, der wu a echder Frank is, obber vo an Schdammdischfreind vo uns, der wu a echder Fän von Närnbercher Clubb bis. Und die Gschichd is fei wergli woär.
Der Freind hassd eichendli Joachim, obber wall der aus Schlesien schdammd, wu amoll daitsch woär und eds zu Bolen gheerd, sogn mir alle neer LUBOSCH zer den. Der Lubosch hodd friehers bein Herziaurier Clubb in der Erschdn gschbilld und haud eds in der Alden Herrn nu rum. Der hodd an richdichn linken Hammer, des hassd bein Fußbolln, däss der an scharfn Schuss mid sein lingen Schlabben, also sein Fuß, hodd. Und wenn der mooch, dann is der aa a richdichs Laufwunder aufn Fußballblads. Obber wenn der Clubb am Freidooch abnds gschbilld hodd, doo laffd der Lubosch am Samsdooch nedd su vill, wall der nu a boär Seidli Bier mid rumdrogn muss, die wu er nooch den Clubb-Schbill zuvill drungen hodd.
Der Lubosch schläffd in schwarz-roder Beddwäsch, hodd an schwarz-rodn Bydschjama oh und wenn amoll nooch an Kobfball sei Noosn bludd, dann bludd die aa schwarz und rod, - bein Lubosch muss alles in die Clubb-Farbn bassiern. Sei Wohnung und aa sei Audo senn vull vo Club-Schal, Club-Wimbel und annerrn Club-Zeich. Und wenn der Clubb amoll verlurn hodd, dann is der Lubosch krank und hodd schwarz-rode Straafn am ganzn Körber.
Obber do is nu was, wu nedd jeder waaß. Wall der Lubosch aaschifdi is, des hassd, däss der sich mid kann Weibsbild nedd rum ärchern muss, hodd der außer an Fernseher wu Dooch und Nachd Fußball laafn dud, nu vier klaane Vecheli, schwarze und roode. Mid dennern kann der sich fei wärgli underhaldn. Obber die heern neer zu und, singa a weng, obber soogn selber niggs.
Die Vechel haaßn: Marek, Mintal, Pinola und Gygax. Wer Clubb-Fän is, der waaß, däss des vier Fußballer von Clubb sän. Und die mooch der Lubosch su arch gern. Die Vecheli heern fei wergli auf die Nama, wu der dennern gebn hodd. Wenn der „Mintal" schreit, sperrd der Mintal-Vochel sein Schnabel auf und dann grichd der von Lubosch a Saladbläddla. Und mid die annern Vecheli is nedd annersch. Und wenn der Lubosch singd: „Schdehd auf, wenn ihr Clubb-Fäns seid", dann fliegn die Vecheli in ihrn Käfich rum. Aaner is a daidscher Kanarienvogel und drei sen a weng ausländisch, wie bein Clubb die Schbieler hald aa.
Jede Wochn gedd der Lubosch nauf in Willert sein Fuddermiddelmargd und kaffd dord Schbezial-Fudder fier seine Lieblinge. Wie der Clubb ledsdn Samsdooch in Wolfsburch gwunna hodd, hodd der die arma Viecher fasd zu Tod gfidderd. Nooch den sexdn odder siebdn Seidli Bier hodd der Lubosch gschrahld iebern ganzn Gsichd, wall der gmaand hodd, däss die Vecheli eds des Clubb-Lied bfeifn kenna.
Und wie der Lubosch uns die Gschichd am nächsdn Dooch derzelld hodd, hodd der Heiner neer nu gsochd: „Do dud mer fei deä Oäsch weh, wennsd sichsd, wos fier närrische Fäns däss des gebn dud!"
Und ich frooch mich, kann eds do der Clubb ieberhaubs nu abschdeign, wenn der solche Fäns hodd?
Iä sächd scho, Frogn ieber Frogn.
Klaus Bedä