„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also die Gschicht, wu ich eich heit derzell, is amoll widder vo mein Freind Heiner, der wu a echder Frank is und a ganz großer Kerwasborsch nu derzu.
Der Heiner gedd geern auf Fesder, auf den Aldschdadtfest, auf der Summerkerwa, auf die ganzn Johannisfeiern und am liebsden is den Heiner die Martini-Kerwa. „Wall dees die echde Kerwa in Schdedtla is, die wus scho vor 2000 Joär gebn hodd", hodd der Heiner drin bein Hellers Hans in unserer Lieblingswärdschafd gsachd. Der Heiner is ja su arch gschichdsbewussd und kennd si aus in Schdedtla und in seiner Gschichde.
Der waaß, däss do der heiliche Kilian scho die erschdn Heriaurier Kinner daufd hodd. „Und voä den Kilian woär villeichd aa scho der heiliche Martin doo, wall mir friehers a Martinskärgn ghabd ham und walls nadierli aa a Martini-Kerwa gebn hodd", su hodd der Heiner bein Hellers Hans derzelld.
Und wall der Heiner su tradidionsbewussd is, gedd der aa jedn Dooch auf der Martini-Kerwa, wall des ja a echde „Fress- und Sauf-Kerwa" is und wall mer si friehers nooch der harden Ärberd su richdi schdärgen gmissd hodd. Do issd der Heiner dann in die Wärdshaiser drin sei Kärbfla, sein Rehbroodn, sei Schaiferla und wenn der dann nu Hunger hodd, haud der Heiner aa nu a Boär Broodwärschd nei. Obber am liebsdn hodd er des Rehraguu, wos drin bein Hellers Hans seiner Mudder und bei den seiner Evi gebn dud.
Gesdern, wu der Heiner von Friehschobbn hamm is, doo hodd den in der Bambercher Schdrass nu amoll der Hunger ieberhulld. Doo is der zern Medzger nei und hodd a „Fleischkeesweggla mid „ABS" verlangd und a zweids Weggla mid „Suchdworschd" füä derhamm. Und wall die Metzgeri nedd gwissd hodd, wos a Weggla mid „ABS" is, hodd der Heiner derer des derklärd. „Also ABS hassd bein Weggla in Franken: A Bissla Senfd" und „Suchdworschd" des is die Hardworschd, die wu su gud is, däss mer sichdi drauf wern kennerd, wall mer nimmer aufhern kann, wenn mer die amoll brobierd hodd und däss mer si doo dervo dumm und daab essen kennerd", hodd der Heiner den Waggerla hinder der Thekn gsochd.
Do woär die Metzgeri ganz schdolz auf ihrer Woär und hodd den Heiner zwaa Riesen-Weggli gmachd, däss der nu a weng Reklame für ihr machn dud. Dann is der Heiner ham zu sein Waggerla, der Marchared, und hodd nu amoll Brodzeid gmachd.
Und danooch hodd der Heiner sei Schdernla eigloodn, däss die mit ihn abnds nu amoll auf der Kerwa geh soll, wall er nu Abbedid auf a weng a Gensla odder a Endenbrisdla hodd. „An Endenoäsch mooch ich nedd, obber wenn ich siech, wos do auf aaner frängischn Kerwa alles zern Essn anbuudn wärd, lauder su ausländische Woär, do dud mer fei deä Oäsch weh, wenn ich des heer und siech!", su hodd der Heiner gjammerd.
Und iech frooch mich, misserdn mir nedd die frängischn Wärd und die Wärdschafdn underschdidsn an der Martini-Kerwa, däss mer waaß, wu mer derhamm is?
Iä sächd scho, Frogn ieber Frogn!
Klaus Bedä