Herzogenauracher Geschichten 222
„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also, die Gschicht, die wu ich eich heit derzell, is mir und mein Freind Heiner, der wu a echder Frank is, fei wergli ledsde Wochn bassierd. Des woär an den Dooch, wu drobn des neie PUMA-Audledd-Zender aufgmachd hodd.
Der Heiner und iech mir woärn grood vor den Schaufensder vo den Kräuderhexla im Staaweech gschdandn und ham die Auslaach schdudierd, wos eds die klaa Hex scho widder füä Zeich in ihrn Loodn hodd, su Kräuder odder Salbn wu villeichd gecher Kreizweh, Gichd odder Hexenschuss helfen dun.
Do senn auf amoll a Hend voll fremde Leit derher kumma, die wu ganz vornehm blauderd ham, däss mir glei gmergd habn, däss des Preißn sei missn. Aaner vo dennern hodd dann auf hochdaitsch gfroochd: „Sagn Se mal, sind Sie von hiea?" Do hodd mei Heiner soford gsochd: „Guder Mooh, ich bin do geborn, daafd woärn, aufgwachsn, in der Schull ganga, dann hob ich in aaner Schuhbudn gärberd und die ledsdn fuchzehr Joär woär ich in der PUMA."
An die Augn und an die Blick vo dennern Leit hast du soford gmergd, däss die neer die Hälfd odder nu wenger verschdandn habn. Und dann hodd der Preiß gsachd: „Könn se uns mal sagen, wo hier die Feuerschau stattfindet?"
Do ham si der Heiner und iech ganz verdudzd angschaud, wall mir nedd gwissd ham, wos der maand. Und der Heiner hodd drauf gsachd: „Guder Mooh, mit Feierschau maanst du gwies die Übung vo der Feierwehr - obber die woär fei scho ledsde Wochn, do woär Brandschutzwochn!"
Eds hodd der Preiß gschaud wie a Kälbla, wus gschdochn habn und gandword: „Ne, ne wia möchten geerne zu diesem Brand-Center, das da heute bei der Firma PUMA eröffnet worden ist und dort wird wohl diese Feuerschau stattfinden!" Do habn der Heiner und iech ganz bleed gschaud, wall mir nedd gwissd haben, ob uns der Preißn-Mooh veroäschen will. Obber auf amoll hodd den Heiner a Blids gschdraafd, a Gedangnblids hald. Und dann hodd der Heiner in besdn hochfrängisch den Preißn-Mooh und seine Leit aufklärt: „Sie maanen gewiss das BRÄND-ZENDER bei den neuen PUMA-AUDLEDD? Guder Mann doh können Sie doch keine Feuerschau nicht sehen. Ein BRÄND-ZENDER ist doch suwos wie eine große Ausstellungshalle für neue Modelle und Zeuch, die wo eine Firma wie PUMA herstellen tut, wo halt alles brand-neu ist."
A weng wos scheint der Preißn Mensch verschdandn zu haben von Heiner sein hochfrängisch, wall der zu seine Mit-Preißn gsochd hodd: „Dann fahren wir man hoch zu diesem Center und dann werden wir anstatt einer Feuerschau eben mal schoppen gehen!"Und dann habn si die Preißn davoh drolld und der Heiner hodd neer nu mid den Kobf gschiddeld.
Und dann hodd der Heiner neer nu gjammerd: „Do dud dä fei deä Oäsch weh, wennsd sichsd, wie die Leit heit mit die moderna Wördder durchanander kumma."
Und ich frooch mich, missn mir in Daitschland denn wergli neer nu mid derer ganzn englischn und ameriganischn Woär lebn, ham denn mir goär ka bissla Schdolz und ka eigena Wördder mehr?
Iä sechd scho Frogn ieber Frogn!
Klaus Bedä