Wahlschein 2009
Herzogenauracher Geschichten 221
„Do dud dä fei deä Oäsch weh!"
Fragen eines nachdenklichen Franken, frei nach B.Brecht
Also, die Gschicht, die wu ich eich heit derzell is vo mein Freind Heiner, der wu a echder Frank is und vo sein Schernla, der Marchared, die wu aa aus Franken is. Demoll gedds um der nächsden Wahl, an derer wu die zwaa nedd derham senn und desderwegn Briefwahl machen missn.
Die zwaaa senn nemli echde Demogradn und machn brav iä Briefwahl. Su is also der Heiner nunder zern Lorenz Gerdi und hodd si die Wahlscheine ghulld. Und dann ham die zwaa ghirnd, wenn sie desmoll wähln soll, wall in derer Wärdschafdskrise muss ja ganz arch aufbassn, däss mer aa die richdichn wähld und der Heiner hodd nu gsachd: „Mer muss die Wärdschafd ankurbeln obber nedd neer die bein Hellers Hans!"
Und dann senn die zwaa voä den Wahlschein gseesn, auf den wu 20 Bardeien drauf schdenn. Der Heiner hodd die Marchared aufklärd. „Also, die großen Bardeien ham mich su arch enddaischd, däss ich desmoll a klaana Bardei wähl!", hodd die Marchared gsochd und dann hodd sie gleesn: FAMILIE; PBC; BüSo; BP; MLPD; CM; RRP; Die Tierschutzpartei;DIE VIOLETTEN; PIRATEN. All su a Woär hodd auf den Wahlschein drauf gschandn.
Doo is die Marchared ganz verwärrd gwesn und hodd sie goär nimmer auskennd, wos die alles verändern wolln. Und do hodd den Heiner sein Waggerla gsochd, „die wolln doch alle näggs annersch als die Großn aa. Die ann wolln mehr Neddo vom Bruddo und jeder will, däss uns besser gedd!"
Do is auf aamoll dennern ihr Enkeli, der klaa Gerch in die Schdubn kumma. Und wall der scho lesn kann, hodd der sich aa den Wahlschein angschaud. Auf aamoll hodd der vor lauder Freid gschriea „Omma, Obba, iech waaß, wos ihr wähln missd: Die Biraden-Pardei. Die sänn kuhl, wall die die Reichen ihr Schiffer ieberfalln und des ganze Geld und des Öl, wos auf die Schiffer is, an die Arma verdaaln. Bei der ledsn Fosernochd, woär iech aas u a Birad mid aaner Augenklabbn und mid an Säbel. Und ich habb mei ganz Geld aa mid meine Freinde daald. Iä missd unbedingd die Biraden wähln, wall ich aa amoll Birad werrn will."
Und dann hodd der Gerch den Obba Heiner su a Augenklabbn aufgsedsd, däss der augschaud hodd wie der Klaus Sdördebegger undder Heiner hodd neer nu gsochd: „Do dud dä fei deä Oäsch weh, wennsd du sichsd, wie weid die Kinner heid scho bollidisch dengn kenna Eds wissen mir, wie und wen mir wähln missn!"
Und ich frooch mich: Ham eds die Biradn bei derer Wahl Schangsen odder daalen do die Großn widder alles underannander auf?
Iä sechd scho, Frogn ieber Frogn.
Klaus Bedä