Herzogenauracher Geschichten 220
„Do dud dä fei deä Oäsch weh!"
Geschichten eines nachdenklichen Franken, frei nach B. Brecht
Also, die Gschichd, wu ich eich heit derzell is suwos wie a freindliche Underhaldung zwischen mein Freind Heiner, wu a echder Frank is, und sein Auchenschdernla, deä Marchared, die wu aa in Frankn aufgwachsn is.
Doderzu muss mer wissen, däss der Heiner a großer Fußballfän is und die Marchared su arch füä der Leichdadhledik schwärmd, wall die frieher amoll in der Madlesschull, su gud in Weidschbrung woär, wu mer frieher „hubfen" gsochd hodd.
Die Marchared hängd scho die ganze Wochn an Fernseher dran und schaud sie alle Weddkämbf vo derer WM an, vo die Mannsbilder und aa vo die Weibsbilder, obwohl mer manchsmoll nedd waaß, ob es die Weibsbilder nedd sugoär Mannsbilder senn. Obber des is hald heid zer dooch arch komblizierd, wecher dennern Geschlechdsumwandlunga.
Und wall bei der Weldmasderschafd ka Ball nedd derbei woär, hodd der Heiner arch gschennd. Obber die Marchared hodd die Fernsehieberdrachung immer verdeidichd. Bein Schdabhochschbrung hodd die Marchared gschwärmd, wie elegand die ieber fünf Meder nieberhubfn." Doo hodd der Heiner gsochd: „Dees ham mir frieher scho mid aaner Bohnaschdanga gmachd, wenn mir iebern Nachbern sein Zaun ghubfd sänn, wenn mir reifa Äbfel und Biern gsäägn ham."
Und aa des Diskuswerfn und des Schbeerwerfn hodd der Marchared su arch gud gfalln. Obber der Heiner hodd neer gsochd:„ Alle Schbordarden senn doch nadierlich und hisdorisch zu erklärn. Aa wenn scho die aldn Griechn Diskus gworfn ham, des kann doch neer dennern ihr Deller mid den Middochessn gwesen sei, wall des nedd gschmeckd hodd, und wall die des ganz weid wech gschleiderd ham. Und aa des Schbeerwerfn kummd doher, wall hald die Alden auf der Jagd ganger senn und Mammud gschossn ham."
Und doo sen die zwaa immer mehr in Schdreid groodn, wecher die olümbischen Schbordarden. Und der Heiner hodd füä jeder aa Erklärung gwissd. „Wenn a Neanderdaler fremd gang is, hodd der dreimoll hubfn missn, däss der nedd derwischd woärn is. Su is der Dreischbrung endschdandn. Kuchelschdoßen hossd missn, wennsd dein Nachbärn, wusd nedd gmechd hossd, an Schdaa an Kubf gwoärfn hossd und renna und ieber an Wassergroobn hubfn hosd immer missn, wennsd voä an Säbelzahndiecher auf der Fluchd woärsd. Und stadds den Hochschbrung senn die bein Ausreißn ieber die Dornaheggn ghubfd. Obber immer mid die Baa voraus und nedd mid den Kobf wie heid!"
Und su hodd der Heiner der Marchared alle Schbordarden vo frieher erklärd. Do woär die Marchared fasd schbrachlos, wall der Heiner su gscheid is. Obber dann hodd die Marchared nu gfroochd:" Wie is es des mid den Hammerwerfn füä Frauen?"
Do hodd der Heiner bloß gsochd: „Do dud mer fei deä Oäsch weh, wennsd du des nedd wassd. Des is doch wie bei uns derhamm. Wenn iech aamoll an Nachel krumm in der Wend neischlooch, dann werfsd doch du mir doch aa an Hammer nooch!"
Do woär die Marchared ganz ruhich und hodd näggs meer gsochd, wall des der Wohrheid endschbrochn hodd.
Und ich froch mich, wie is eds des bei den 50 Kilomeder „Gehen"? Warum eiern die do su rum? Ham eds die bein Laafn alle scho an Wolf, des hodd der Heiner nedd biologisch erklärd!
Iä sächd scho: Frogn ieber Frogn!"
Klaus Bedä