Herzogenauracher Geschichten 219
„Do dud dä fei deä Oäsch weh!"
Fragen eines nachdenklichen Franken, frei nach B.Brecht
Also in der Gschicht, die wu ich eich heit derzell, getts um mein Freind Heiner, der wu a echder Frank is und allerwall a archs Broblem hodd. Den Heiner kannsd du bollidisch goär nedd su richdi eiordna. Von daham her is der Heiner eichendli a Rodbaggerder, wall den sei Familie hald scho immer mid die Arbeider solledarisch woär. Manchsmoll obber is der Heiner aa ganz schee ald- baggen, däss mer maana kenned, däss er a Schwarzer is und wenns um die Viecher und um der Nadur gedd, kennerd mer maana, däss der Heiner sugoär a Griener is. Obber in sein Herz, do is der Heiner a Herziaurier, wall der neer des Besde für unnern Schdeedtla will.
Wos den Heiner im Momend su arch im Moogn lichd, is, des Verkehrsbroblem wu Herziaura derzeid hodd. Der Heiner is a großer Fän vo der Eisabahn, wall der scho frühers immer mit den Ziechla nei auf Erlang auf der Ärberd gfoärn is.
Wu der Heiner in den „FT" gleesn hodd, däss die S-Bahn eds vo Närnberch bis nei auf Bamberch baud werd und däss in ganz Middelfrangn Bahna baud wern, sugoär auf Weinzierlein, wall dort die Kardelaggademie is, hodd der Heiner kmooserd: „Jeeds Bauerndorf hodd an Bahnhuuf, neer Herziaura hodd kann mehr!", und dann hodd der Heiner nu gsachd, er find des gud, däss der Nussels Walder und der Körners Doggder eds aa widder a Bähnla für unsern Schdeedtla wolln.
„Eds, wus mid der INA widder aufwärds gedd, kennerdn doch die INA-Leit mid der Bahn raus auf Herziaura foärn und widder nei auf Erlang und mir braicherdn aa kanne Busse, wu suvill Abgase ausstoßn." Und wie ich den Heiner voäghaldn hobb, däss dees doch arch umständli is, wenn mer von Lohhof odder vo der Haydnschdrass erschd zun Bahnhof muss, den wus nimmer gibd, dann an Bargblads suuchn muss und dann villeichd doch lieber mid den Audo nei auf Erlang odder Närnberch fährd, do hodd der Heiner an ganz neia Voäschlooch brachd.
Iä missd wissen, däss der Heiner manchsmoll a weng schbinnerde Ideen hodd, die wu obber goär nedd su verkehrd senn. Der Heiner hodd amoll in Fernsäng gsäng, däss in Hongkong die längsde Rolltrebbn vo der ganzn Weld gebn dud. Und do hodd der füä Herziaura an Blaan endwiggeld:
„Die Schdadt baud eds des längste Förderband vo der Weld vo Herziaura nei auf Erlang! Am, Kreisl gedds luus, do kennern die alle Herziaurier, vo der INA und die von ADIDAS ei- und ausschdeign dann foärn mir die Flughafenschrass nauf zer der PUMA und zu die Audledds und nei auf Hauadorf. Neber den Radweech is die Schdregg idial. Bei Polsters Seppl in Hauadorf kann mer schnell runderhubfn und sich den weldberühmden Streusleskuugn kaafn und dann rolln mir weider nei auf Haisling. Do is aa a Wärdshaus, wu mer eikehrn kann und dann führd die Rolldrebbn nooch Bimbach (hochdeutsch Büchenbach). Do kennersd aa bein Güthlein ein Seidlein drinken und mir rolln dann ieber den Regnitzgrund nei auf Erlang aufn Großbarkblads an Bahnhuuf."
Do hodd der Heiner vo an Ohr bis zun annern gschrahld und hodd nu gsachd:" Do dud mer fei deä Oäsch weh, wenn des nedd a subber Idee is, die wu von den Siemens logger verwärglichd wern kann."- Und dann hodd der Heiner nu vuägschloogn: „Hindern Schuddblads odder an derer Schdregg kennerd der „Rode Kormoran" aa sei neis Landradsamd baua, doo basserds hie und mer braicherd kaa Audo und kann Bus meer und mir häddn a saubere Lufd und aa a boär Wärdshäuser on der Schdregg, wu wichdi sen für der Gsundheid."
Do ham meine Schdammdischbrieder gsochd, däss der Heiner hald a echder Herziaurier is, die wu scho immer „innovadiv" woärn und hald dolle Ideen ghabbd ham.
Und iech frooch mich: Wär´ des niggs, Herziaura und die längsde Rolldrebbn, wu mer aa ieberdachn kennerd und wu a Weld-Sensadion wär´?
Iä sechd scho, Frogn ieber Frogn!
Klaus Bedä