„Do dud dä fei deä Oäsch weh!"
Fragen eines nachdenklichen Franken, frei nach B.Brecht.
Also die Gschicht, die wu ich eich heit derzell is vo mein irrerdierden Freind Heiner, der wu a echder Frank is. Desmoll gedds um den Heiner, der wu in der Schul ka Fremdschbroochn glernd hodd, walls sellmoll zer den seiner Schullzeid neer „Daitsch" als Fremdschbrooch gebn hodd, denn die Gebrauchsschbrooch in der Bubnschull, wu der Heiner neiganga is, woär „Frängisch". Do is der Heiner berfeggd drin und der kann hald aa nu alda frängischa Ausdrigg. Er waaß, wos a „Hetzl" is (Elster auf hochdeutsch), wos a Butzn odder a Knobbern und a elender Knobbern is. Wie die Ammi auf Herziaura kumma sen, hodd der Heiner aa a boär Werdli ameriganisch glernd, obber mehrer als „Ballmall, Laggi Schdreik odder Cämmel" hodd der nedd soogn kenna, hechsdens nu „Dschu-in-gamm". Der Heiner is zwoär gfirmd woärn, obber der heilich Geist hodd sei Schbroochn-Wunner nedd ieber den Heiner ausgschidd.
Neili is der Heiner mit seiner Marchared drin in Erlang bein goggern gween. Er hodd si scho gärcherd, däss die Marchared von „schobben" gredt hodd, wall der Heiner hald die ausländischn Wärder nedd su geern mooch. Und do hodd si der Heiner gwunnerd, däss on an Hafdn vo die Leedn an die Schaufensder immer „SALE" gschandn is.
Do hodd si der Heiner erinnert, däss er vor 30 Joär amoll mid der Marchared auf Cämbing in Italien woär und däss die Marchared ihn doo auf Eikaafn gschiggd hodd und gsochd hodd, er soll aa Salz hulln für die Schbagheddi. Do hodd der Heiner fei in an Zigereddenloodn gmissd und der Verkaifer hodd den Heiner aufgleerd, däss SALZ auf idalienisch „SALE" und SUNNA „SOLE" haaßen dud. Obber trodzdem hodd der Heiner die zwaa Werdli immer widder verwechseld und bein nächsdn Moll hodd si die Verkaiferi gscheggerd glachd, wie der Heiner „SOLE" kaafn wolld.
Und wie der Heiner mid seiner Marchared ieber der Nordumgehung hamm gfoärn is, hodd der bei den ADIDAS-AUDLEDD und bei der PUMA und aa bein Sport Hoffmann ieberoll des Werdla „SALE" gleesn. Do hodd der Heiner ieberhaubs niggs mehr verschdanna. Und wie er vur sich hie brummeld hodd: „Gedds denn eds dennern in derer Wärtschaftskriese su arch schlechd, däss die ieberall scho SALZ verkaafn missn, dermid do Geld in die Kassa kummd?" Und immer widder hodd der Heiner „SALE, SALE"gsochd, bis die Marchared gfroochd hodd, ob er eds schbinnd und villeichd zuvill Sunna derwischd hodd.
Und wie der Heiner gfroochd hodd, worum die ieberoll SALZ verkaafn missn hodd die Marchared mid den Kobf gschiddeld und hodd den Heiner aufkleerd, däss des näggs mid SALZ zer doo hodd, sondern däss des Wärdla „SE-IL" haaßen dud und suvill bedait wie „rundergsedsd odder Schlussverkauf".
Do hodd der Heiner die Weld nimmer verschdandn, wall der des Wärdla „SALE" scho des ganze Joär ieberoll gsängn hodd und er hodd grandeld: „Do dud mer fei der Oäsch weh, wennsd sichsd, däss die des ganze Joär ieberoll „SALE" machen. Friehers hodds an Summerschulssverkauf und an Winderschlussverkauf gebn und heit is des ganze Joär „SALE". Iech geh edds nei zern Hellers Hans und kaaf mir a „SALE-KERWA-BIER" von ledsdn Kerwa-Fässla zern halbn Preis!"
Und iech frooch mich, hodd eds der Heiner nedd rechd, wenn der su a „SALE-BIER" kaafn will, wu doch alles eds rundergsedsd is? Iech geh an Samsdooch aa zern Heller und kaaf mir su a „SALE-BIER" - prost.
Iä sechd scho Frogn ieber Frogn!
Klaus Bedä