„Do dud dä fei deä Oäsch weh!"
Fragen eines nachdenklichen Franken, frei nach B.Brecht
Also die Gschicht, die wu ich eich heit derzell, is zwoär aa vo mein Freind Heiner, wu a echder Frank is, obber haubdsächli von den sein Waggerla, der Marchared. Des woär an ledsdn Freidooch. Der Heiner hodd si vorbereid auf der fünfdn Jahreszeid. Na, nedd auf der Fosernochd, sondern auf den Weiherschbach, wu die Herziaurier Kerwa gfeierd werd, auf die wu der Heiner jeden Dooch gett, wall der a Weiherschbachfän is.
Do hodd auf amoll die Marchared färchderli gschriea, däss der Heiner gmaand hodd, däss die ieberfalln woärn is. Die Marchared woär in ihrn Haushaldszimmer an ihrer Quelle Nehmaschinn und hodd a Hemm von Heiner gfliggd und dodäbei in ihrn klann Fernseher neigschaud, den wu ihr der Heiner vor zehr Joär drin in der Quelle kaffd hodd.
Der Heiner und die Marchared sän nämli su arch große Fäns vo der Quelle, wall mer do su ginsti eikaafn kann. Gott sei Dank woär der Marchared näggs bassierd. Sie hodd si neer su arch gfreid, däss eds endli der neie Quelle-Kaddalooch gedruggd wern kann und däss des alde frängische Undernehmen weider eggsisdierd, wall die eds endli den Milliona-Kredid grichd ham. Fasd grinna hodd die Fraa vuä Freid, wall der Marchared ihr Mudder hodd scho voärn Kriech bein alden Gustav Schiggedanz immer billich eikaffd. Und die Marchared kennd aa die klaa Madlääne, derer wu eds neer nu a weng vo der Quelle gheerd und a Loodn driebn in Laff wu des Bimberla derham is.
Wie si die Marchared widder beruhichd hodd, hodd si den Heiner gsochd, däss sie an Quelle-Fän-Club gründen dud, damid vill Leit eds bei der Quelle eikaafn dun, däss des mid derer widder aufwärds gedd. „Mir Frangen missn doch zammhaldn, aa wenn bei der Quelle an Haffdn Sachsn ärbern", hodd die Marchared gsochd und der Heiner wu scho arch lang a Fän vo die Färdder Fußboller is und die Färdder Fahna draus hänga hodd, hodd neer nu midn Kubf gniggd.
Am nächsdn Dooch is die Marchared zu mein Bärbala kumma und hodd derer su richdi des Maul wässri gmachd, däss die aa midmachn dud in den Fän-Club. Und do is die Bärbl aa ganz sieri woärn und hodd sie erinnerd, däss ihr erschder Kühlschrank, die erschde Waschmaschinn, mei erschder eleggdrischer Rasierabbarad und aa mei Fohrrood vo der Quelle woärn. „Und fasd alles hodd „PRIVILEG" ghaaßn", hodd der Heiner gsochd.
Und dann ham si die zwaa Maadli immer mehr zamgschbunna und sän zu ihre Freindinna und ham die aa in den Fänclub aufgnumma. Sie ham dennern erzälld, däss do su scheena Bliesli, Huusn, su Pömps Schuh, gienstia Huusnanziech und Bulleverli gidd „und dees fei aa in Iebergreeßn" hodd mei Bärbel gsochd. Do bassn dann a die „Bradoscheerdn" nei, wos suvill hasst wie „die braad Oäscherdn".
Und dann ham die Maali gschwärmd vo derer Safari-Beddwesch, von Heiner seiner Feinribb Underwäsch, vo die Cargo Huusn fier die Mannsbilder, wu mer bein Wandern die Broodwerschd in die Daschn verschdeggn kann. „Und aa die Debbich sen su arch giensti in der Quelle, däsd den fliechenden Deppichhendler von Närnbercher Club mit seine Breise vergessn kannsd", hodd die Marchared gsochd.
Do hodd der Heiner neer nu soogn kenna „Do dud mer fei deä Oäsch weh, wenn mer sichd, wos die vo derer „ARACONDOR" odder wie des hassd hie gmachd ham, däss unser gude alde frängische Quelle fasd drauf ganga is."
Und iech frooch mich, is dees nedd in Ordnung, wenn mir Frangn eds zammhaldn , walls scho den aldn Grundig und die AEG und aa nu annere Woär hiegmachd ham. Mir missn doch den gegeelden Wärdschafds-Baron aus Oberfrangen aa amoll zeign, wos „Sollididäd" in Frangn hassd?
Iä sächd scho, Frogn ieber Frogn!
Klaus Bedä
So, das ist nun eine überarbeitete Version des Quelle-Oäsches!
Gruß vom „behinderten" Peter!