„Do dud dä fei deä Oäsch weh!"
Fragen eines nachdenklichen Franken, frei nach B.Brecht
Also die Gschicht, die wu ich eich heit derzell, is amoll widder vo mein Freind Heiner, der wu a echder Frank is. Desmoll gedds um den Heiner, der wu eichendli a Schbroochnschenie is, vor allem wenn der a boär Seidli von Hellers Hans sein besdn Schdoff gedrunken hodd. Do hodd der Heiner si scho mit die Franzeesli vo unserer Bardnerschdadt „Sände Luze", wie er immer sochd underhaldn, däss die gmaand hom, er kann wergli a alde franzesische Schbrooch.
Wie die Ami nu doo woärn, hodd si der Heiner aa mit dennern auf ameriganisch underhaldn. Hooserfudder woär für den Heiner a „Gräs for mei Häs" und als Kind hodd der Heiner, wenn der an Ami gsäng hodd, immer gschriea „Ami go home - Kaugummi"!
Der Heiner hodd nie ka Schbroochn glernt, wall der immer gsochd hodd, ich kann frängisch, do verschdenns mi in Erlang, in Bamberch und aa in Nernberch und drund in München verschdenns uns Frangn suwisu nedd.
Wie do neili der Heiner su ieber Schbroochn sinnierd hodd, do is auf amoll sei Enkerli, der klaa Gerch kumma und hodd zun Heiner gsochd, däss er eds in Urlaub fährt und den Obba dann a SMS schiggd odder a E-mail. Obber der Heiner hodds nedd su arch mid der Technik. Emaille is für den a Glasur auf an Dobf und wos a SMS is, waaß der aa nedd, wall der ka su a Delefon hodd, wu mer rumdroogn kann und dauernd die annern Leit auf die Nervn gedd, wall mer ieberoll neischreia muss.
Den Heiner nervn außerdem die Haufn Abkörzunga in unserer Schbrooch. „Dauernd mussd ieberleegn, wos doo gmaand is mit dennern Abkörzunga. Wos is eds a KITA und wos is KIKA? Heit werd doch neer nu mit Abkürzunga gredt odder gschdammeld" hodd der Heiner gsochd. „Die Kinner ham „ADS", wenns nedd ruhich auf ihrn Oäsch sidsn kenna und mei Audo hat a „ABS" - System. Neilich hodd aaner bei mein Medsger a Fleischkeesweggla mid ABS verlangd. . Do hob ich gfroochd, wos dees is. Do hodd die Medsgeri gsochd „Des mussd doch wissen: Des hassd a Weggla mit„A Bissla Senfd".
Do hodd der Heiner fasd a Schreikrambf grichd und hodd gschennd: friehers hosd a Fußballschbill in Schdadion angschaud, heid gibds a „PV", wos suvill hasd wie „Public Viewing" und do maand mer a Fußboll-Ieberdrachung auf aaner großn Leinwand erchendwu in der Schdadt. Obber in Wärglichkeid is in Ameriga a „PV", wenn mer an Doodn aufbarn dud.
„Und ieberhaubs reechd mich des mid dennern Abkörzunga auf: die Bauschorkassa hasd „BHW", die Audoversicherung „HUK" und die Krankenkassa, wu immer bloß die Hälfd zohld is die „AOK". Delefoniern muss ich über „O2" und der Sportsender is des „DSF". Do wassd doch bald nimmer, wos mid dennern ganzen Abkörzunga anfanga sollsd. Frieher hodds glangd, wennsd du gwissd hossd, wos FC, ASV SC hassd, obber heid werd des immer bleeder, do dud mer fei der Oäsch weh!"
Und ich frooch mich: Hodd eds do der Heiner nedd a bissla recht, wenn der sich ieber die ganzn Ankörzunga su aufreechd, wall mer doch ball nimmer waaß, wos do gmaand is mid derer Woär und die ganzn Abkörzunga?
Iä sechd scho: Frogn ieber Frogn!
Klaus Bedä