„Do dud dä fei deä Oäsch weh!"
Fragen eines nachdenklichen Franken, frei nach B.Brecht
Also die Gschicht, wu ich eich heit derzell, is scho widder vo mein Heiner, der wu a echder Frank is.
Desmoll is der Heiner zu uns in unserer Lieblingswärdschft neikumma und hodd die ganze Wärdschafd drin bein Hellers Hans underhaldn, und zwoär is desmoll um der Bollerdigg ganga, genauer gsochd um der Landkreisbollerdig.
Obber der Heiner hodd nedd gsochd, däss der in aaner Kreisdoochssidsung woär, der hodd immer widder vo an Kasberlesdeater derzellt, wu er derlebbt hodd.
Also des woär su: Der Heiner woär in derer Ausschuss-Sidsung wus um der Endscheidung gang ais, wu eds des neie Landradsamt hiekumma soll. Ob nooch Erlang odder nooch Herziaura. „Also", hodd der Heiner gsochd, „Die Beschbrechung woär su wos wie die Augsburger Bubbenkisde. Der Landrood woär suwos ähnlichs wie der Lukas, der Loggermodivführer und der Brehms Bebbo, wu Bärchermasder vo Höchschdadt is, woär der Jim Knopf, der wu den Weech angebn hodd, wu die Loggermodiv foärn soll. Obber do woär dann nu der Genosse Bubel aus Adelsdorf, der wu ja sein eichenen soziliastischen Schdandbungd hodd, wall der ja in der alden DDR sein bollidischen Schliff grichd hodd. Und der hodd gmaand, däss er suwos wie der Weichenwärder sei muss. Und der is dann sugoär sein eichena Landroodsgenossen mid sein Pfadfindermesserla in Rüggn neigfalln."
Jeder hodd bei derer Sidsung gmergd und des hodd si widder amoll rausgschdellt, däss der Lndkreis ka Einheid is, sondern a zammgärfelder Hafdn. „Wie willsd denn du die Eggentaler und die Vestenbergsgreither under an Hud bringa. Die Tee-Baierli und die Gebirchler die bassn doch nedd zam.. AA wenn der Hackers German gmaand hodd, däss des Kind nooch 37 Jährli eds erwachsn sei misserd. Und dann hodd der Heiner wos ganz Vernündigs gsachd: „Ich kann ja die von Gebirch verschdeh, däss die lieber auf Erlang stadds auf Herziaura foärn welln, wenn die an Reisebass braugn, wall des hald körzer is und wall die dann in Erlang nu a weng eikaafen kenna. Obber bei den Brehms Bebbo hasd doch su richdi gemergd, däss der immer nu a Herziaura-Hasser is und däss der als echder Höchschtadter Roidl an Herziaurier Flacken näggs gönnd."
Wers nedd waaß: „Roidl" sochd mer zu an ungehobelden Klods, also an groben Kerl, und „Flacken" sen Tauben (odder Kerwasborschn), die wu nooch der Kerwa nedd ham gen, sondern in an fremden Schlooch iebernachdn! Und des sen hald die Schbidsnama fier die Heschedter und die Herziaurier. Die „Roidl" und die „Flacken" meegn sie nedd und des is scho su seid der Schdeinzeit. Desweegn sän aa die immer gecher nanner in der Bollerdigg, aa wenn die vo der gleichn Bardei sen. Obber desmoll woärn aa die Sozi gecher ihrn Haibdling „Großer Ebi", aa der Vice-Haibdling „Großer roter Bruder Bubel", wall der Ebi sich hald goär su arch fier sein Schbezi den Hackers German und fier Herziaura eigsedsd hodd.
Na ja und dann ham die Herrshafdn von Kreisdooch hie und her gwaafd und do hodd der Heiner gsochd: „Wennsd des Kaschberlesteater sichsd, wu do in Kreisdooch gschbilld werd wecher den Landradsamd und däss die in värzeä Dooch nu amoll den selben Kees dischkerdiern, do dud mer fei deä Oäsch weh!"
Und iech froch mich: worum kenner die von Kreisdooch sich nedd fier den Draumblads Herziaura endscheidn? Mir senn doch wergli der Nabl vo der Weld, aa wenn die INA, die ADIDAS und die PUMA momendan a weng schwächeln.
Iä sechd scho, Frogn ieber Frogn!
Klaus Bedä