„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also die Ggschicht, wu ich eich heit derzell, is widder amoll vo mein Freind Heiner, der wu nedd neer a echder Frank is, sonnern aa a großer Fußballfän und aa a echder Eggsberde wie der Weichleins Erich in Weingartsgreith.
Wie der Heiner ledsdn Samsdooch nei in unserer Lieblingswärdschafd zern Hellers Hans kumma is, do hodd der su komisch mid sein Kopf hi und her gwaggeld und gschiddeld, däss mir richdi Angsd um unsern Schdammdischbruder grichd ham, ob eds den a Schleechla droffn hodd, ob der Schiddelfrosd hodd odder ob der su a Waggelkrankheid hodd, wu manche äldere Leit krieng.
Obber der Heiner woär in Werglichkeid nedd krank; er hodd neer den Kobf gschiddeld über dees, wos er von Herziaurier Club seiner Generalversammlung derfohrn hodd. Eichendli is der Heiner sei Lebdooch lang scho a Rotbaggerder, des hasst a echder ASVler. Der ASV is suwos wie a Unterabdeilung vo der SPD. Obber a die schwarze Niederlassung vo der CSU, der FC in Herziaura lichd den Heiner am Herzn, wall der hald mecherd, däss mid den Fußball in Schdeedtla widder aufwärds gett. Und der Heiner gett a manchsmoll nauf zern Club zu an Wettschbill und woär fei aa scho aamoll in FC-Heim auf a Seidla Bier.
Und su kann der Heiner goär nedd verschdeh, wos do am Freidooch in Clubheim gloffn is. Immer widder hodd der sein Schiddelfrosd grichd und hodd gmaand: „Mid Schbord hodd des neggs mehr zer doo, des woär doch reine Bollidigg, wos do ba der Vorschdandswahl gloffn is. Des woär a reiner Machdkambf zwischer zwaa Schdadträr aus der gleichn Bardei, die wu si scheins goär nedd meegn."
Und dann hodd der Heiner weider schbeggerliert: „Der Zollhöfers Kurd, wu si bei seiner Abschiedsreed su arch beweihraicherd hodd wie a Bfarrer, wos er alles gmachd hodd odder aa nedd, mecherd villeicht nu mehrer wern als wie er scho is. Villeichd langt den nedd, däss er den Vorsids vo die Schwarzn hodd. Villeichd mecherd der aa nu Berchermasder wern odder aa in Bezirksdooch odder goär in Landdooch. Und der Nussels Walder, der wu a ganz scheene Bruchlandung bei der Wahl hie gleechd hodd, mecherd widder des Fliegn lerna und vom Weihersbach drobn gedd des villeichd leichter, wenn mer nu mehra Fäns hinder sich hodd u nu a neis Bösdla zu seine annern Ämder."
Und dann hodd der Heiner nu gsochd: „Do dud mer fei der Oäsch weh, wenn aaner aus an Verein ausdreedn dud, neer wall der den Gechenkandidadn nedd mooch, aa wenn der kloär gwähld woärn is. Su aaner kann doch ka echder Clubberer sei!" Und doo drieber is der Heiner ins Bollidisiern kumma: „Wos is denn ieberhaubs in den Herziaurier Schdadtrod los. Do ham die Roten die Wahl gwunna und ham Brobleme mid ihrn eichena Bärchermasder, wall si nedd su richdich wissen, wie des Regiern gedd und dann zerschdreidn si die Schwarzn und sen a richdicher Scherbnhafdn, wu kaaner amoll richdi aufn Diesch haud, wie des friehers der Orts Hans odder der Langs Hans gmachd hodd!"
Und ich frooch mich, hodd eds do der Heiner nedd a weng Rechd odder sugoär ganzergoär, wenn der festschdelld, däss mir a schwache Regierungsbardei und a nu schwächere Obbosidion in Schdeedtla ham und hoffendli behäld do der Bärchermasder wengsdens den Durch- und Ieberbligg.
Iä sächd scho, Frogn ieber Frogn!
Klaus Bedä