„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also in der Gschicht, die wu ich eich heit derzell, is mei Freind Heiner, der wu a echter Frank is, amoll nett die Haubdperson., sondern a annere große Berson aus Herziaura, eichendli sugoä a Bersönlichkeit.. Und die Gschichd, wu den Heiner do bassierd is, is fei wergli woärund nedd derfunna.
Also des woär su: Der Heiner is neili am Samsdooch Middooch durch sei Schdeedtla ganga. In der Näh vo der Schboärkassa woär a großer Fohrrodfohrer gschdandn mit an Helm aufn Kobf und mid richdicher Fohrroodmontur anzuugn, also verkehrssicher und verkehrsgerechd.
Do is a junger Mooh daherkumma, su a Waldarbeider ausn Bayerischn Wald, der wu füä der Waldkorbortion Hulz in Donwald gmachd hodd und vo den Vorschdand, den Müllers Helmut, auszohld worrn is.
Der Mooh, der wu Heinz hassd, hodd ka Klaageld grichd ghabd, neer an 500 Euro Schein. Doodermid hodd der obber seine Arbeider nedd auszohln kenna. Die ham obber a Geld gwelld für den Herziaurier Nachtleebn.
Der Heinz hodd in der Schboarkassa wechsln wolln, obber dees is an den Audomadn nedd ganga. Und die ganzn Gschefder, wu der sei 500 Euro wechsln gwolld hodd, woärn scho zu und nerchendswu hodd der an gfunna. Aa den Hellers Hans sei Kassa, wu sunsd immer ganz schee vull is, hodd ka fünf hunderd Euro Wechselgeld hergebn.
Do woär der Heinz in sein Elend doogschdandn und hodd nedd gwissd wos der machen soll. Kanner vo die Leit, die wu voäbeiganga senn, hodd nadierli su an großen Schein wechsln kenna, aa wenn der echd woär.
Und su is der Heinz ieber der Schrass zu den Radfohrer, der wu si grod mid an annern Mooh underhaldn hodd. Ganz hefli hodd der auf niederbayrisch gfrochd, wu mer denn in Herziaura a Geld wechsln kennerd. Do hodd der Roodfohrer mit sein Helm ganz heflich gsochd, däss er dess hald aa nedd waaß, walls in schdeedtla kann Wechselaudomaadn hald nedd gibt. Und dann hodd der Mooh ganz auf Hochdeitsch, su als wenn der a Fremder wär, gsochd:" gehen Sie doch bitte in das Vereinshaus in der Hinteren Gasse; dort ist eine Veranstaltung von Herrn Walter Nussel, dort kann man Ihnen sicherlich wechseln."
Doo woär der klaa Heinz ausn Wald su richdi froh und glickli, däss ner eds gholfn werrn kann. Er hodd sie freindli bedangd und hodd neer nu gsochd, däss er des eds glei machd und däss der Walter Nussel a ganz guder Freind von ihn is, wall der aa a Waldler is. Und do hodd der Roodfohrer ganz schbondan gsachd: „Und ich bin der neue Bürgermeister."
Do is der Hinz ganz schee zamzuggd und hodd a ganz rode Biern grichd, wall des denn eds a weng beinlich woär und er nie gedochd hedd, däss er su den Herziaurier Bärchermasder dreffn dud.
Und mei Freind Heiner, der wu des alles gsäng und beobachd hodd, hodd scho a wenig verschdohlns glachd und hodd dann schbeder bein Heller gsochd: „Do dud mei fei deä Oäsch weh, wenn ich seh, wie arch sich die Leit in unsern neia Bärchermasder daischn kenna, aa wenn der ka Krawaddn und kann Anzuuch nedd an hodd!"
Und ich froch mich, kann mer si in an Fohrroodfohrer nedd aa manchmal daischn?"
Ir sechd scho Frogn ieber Frogn!"
Klaus Bedä