Herzogenauracher Geschichten 209
„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also, die Gschicht, die wu ich eich heit derzell, is desmoll neer nebnbei vo mein Freind Heiner, wu a echder Frank is. Es gett eichendli mehrer um den Heiner sein Auchenschdernla, der Marchared. Die Marchared is eichendli gut kaddolisch, wall die immer nei in ihrer Kergn gett und aa immer an Weihnachdn wos schbendn dud für der Mission. Obber ganz dief drin in ihrn schwarzn Herz is sie a weng abergläubisch.
Die Marchared liest in den „FT" drin immer des Horrorskop odder wie des hassd, mecherd gern, dass do jedn Dooch aans drin schedd wie in der BILD-Zeidung und außerdem hodd sie sich zer Weihnachdn aa nu a Buch mid „Chinesischer Astrologie" gwinschd, wall sie seid den Olymbia in Peking a weng a Fän von der asiadischen Mendalidäd is.
Am 2. Feierdooch is die Marchared mit ihrn Biechli kumma und hodd uns erscht amoll gsachd, däss des in China 12 Tierzeichn gebn dud, die wu obber a weng annersch sen als die in Deitschland. Schdadds im Schernzeichn vo Löwen, Krebs odder Widder werd mer do in China im Joär von Tiger, Ratte, Schlange, Schwein, Hahn odder Hund, vo Affe, Hase odder Büffel, vo Pferd, Drache odder Ziege geborn.
Und dann hodd die Marchared gsochd, däss mir amoll radn solln, zu wos für an Dier sie gherd. Der Heiner und iech, mir kenna die Marchared und ihr Temberamend. In eurobäischn Lebn is die nemli a Schdier, villeichd sugoär a schbanischer Schdier, wu fürn Kambf in der Arena gezichd werd. Die Marchared hodd nemli scho öfders in an Wud-Anfall des Ess-Gscherr und nu annere Woär nooch den arma Heiner gworfn und nu mehra.
Kanner vo uns zwaa hodd si die Woarheid auf der Marchared ihrer Frooch sogn draua, wall mir uns sicher woärn, däss die in China a Drachn odder a Schlanga sei muss. Däss die a Gaaß, zu hochdaitsch „eine Ziege", a Äffla oder a gschrubbder Radds (Ratte) is, ham mir aa nedd soogn welln. Doo ham mir groodn, däss sie woärscheinli a Heesla is, in chinesisch „ein Hase".
Obber naa! Die Marchared hodd gschdrahld und gsachd, däss sie im Joär der Schlange geborn is. Sie hodd uns ihr Biechla under der Noosn ghaldn, wu die ganzn Eichenschafdn drin gschdandn senn und hodd sie uns vorglesn, obber neer die gudn. Do woär gschandn: „Im Jahr der Schlange Geborene sind davon überzeugt, dass sie für etwas Besonderes bestimmt sind. Sie sind kein Durchschnittsmensch, sie sind auf eine gewichtige Herausforderung eingestellt.... und verfügen über eine große Anziehungskraft, der sich niemand entziehen traut...."
Und wall die Marchared doo derbei zwaa Kebf gresser woärn is, habn si der Heiner und iech des Biechla aa amoll gebn lossn und ham drin gleesn. Do hodds ghaaßn: „Im Jahr der Schlange Geborene: Ihre Fehler und Schwächen: Sie besitzen eine Neigung, ihre Umwelt zu beschwindeln, Dickköpfigkeit und ein heftiges Temperament, das sie bei jeder Kleinigkeit zu Explosionen treibt... Auch an ihre Freunde stellen sie überaus große Ansprüche....Ihr Stolz vernebelt ihnen manchmal den Blick, sie merken nicht, dass und wo sie Fehler gemacht haben...."
Do hodd der Heiner ganz große Aagn grichd, hodd den Kopf gschiddeld und hodd ksochd: "Do dud mei fei der Oäsch weh, wensd du sichsd, wie gud des chinesische Horrorskop auf der Marchared bassd! Iech maan, ich werr eds zu die Chinesn ihrn Glaubn ieberdredn!"
Und ich frooch mich, senn eds die chinesischn Horrorskoper nedd wergli besser und dreffender als wie die daitschn, wall die auf der Marchared su arch gud zudreffn?
Iä sechd scho: Frogn ieber Frogn!
Klaus Bedä