„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also die Gschicht, die wu ich eich heit derzell, is widder amoll vo mein Freind Heiner, der wu a echder Frank is. Der Heiner is seid a boä Dooch arch gud drauf. Der singd und bfeifd und is su richdi lusti.
Wie der in derer Wochn von Dämmerschobben ham kumma is zu sein Auchenschdernla, der Marchared, hodd der gsunga „Morgen Kinder werd´s wos geben, morgen werden mir uns freu´n!" Do hodd die Marchared den Heiner gfoochd, ob er eds scho widder bsuffn is und ob er gwieß scho widder auf aaner Weihnachtsfeier drin bein Hellers Hans in seiner Lieblingswärdschafd woär.
Der Heiner hodd nämli in ledsder zeit a boär Moll su a klaans Raischli ham droogn, wall der den Heller sein Weihnachdsbock in den Joär widder nei enddeggd hodd,der wu su arch süffi is.
Und dann hodd der Heiner in die höchsden Döne aa scheens Liedli nochn annern gsunga: „Lustich., lusdich, drallala..." und „Lossd uns froh und munder sein...". Do hodd die Marchared goär nimmer gwissd, wos eds in den Heiner neigfoärn is und sie hodd zer meiner Bärbl gsochd:. „Ich waaß goär nedd, friehers hodd si der in Advent doch nie su arch auf die Weihnechden gfreid. Im Gechenteil, do is der Heiner in derer stillen Advendszeid immer fuchdi gween, wecher den Fasden."
Obber die Marchared hodd verschwiegn, däss dees wecher den Christbaam Kaafn und Aufschdelln woär, wu der Heiner immer mit sein Schdernla iebers Kreiz kumma is, wall der der Marchared näggs hodd rechd machen kenna.
Und wie der Heiner der Marchared dann ereffnd hodd, däss er eds jeden Dooch mit den jüngsdn Enkeli aufn Margdblads zu den lebendichn Advendskallenner gedd, do is den Heiner sei klaaner Hausdrachn neigieri woärn, woss eds do dahinder schdeggd, wall den Heiner doch der Kallenner sunsd immer wurschd woär.
Und dann hodd die Marchared am nächsdn Dooch in den „FT" gleesn hodd, däss do in den Tierla am Margdblads a Bauchdänzeri auftredn is. Do hodd sie gwissd, wos in den Heiner nei gfoärn is. „Du alder Schlack siechsd die junga Maali immer nu su geern" hodd die Marchared zu den Heiner gsoochd." Und doo hodd der Heiner die Marchared mid an ganz verklärdn Blick angschaud, hodd dran dacht, wie die vor 30 Joär ausgschaud hodd und hodd gsachd, däss dees doch hechsdns a klaana Sind is und däss mer su wos nedd beichdn muss.
Und dann hodd der Heiner nu gsunga „Morgen Heiner wird´s wos geben, morgen kannsd du dich arch freu´n..." Do hodd nemli der Heiner drauf ghoffd, däss villeichd der Nussels Walter nooch den großn Erfolch von der Schi-Keller-Party aufn FC Keller eds aa wos schbendn dud fier den lebendichn Adventskallenner und zwoär fier der älderen Generadion und däss er eds den Walder anrufn dud, wies amoll mid an Schdribbdies-Auftridd auf derer Biehna drund am Margdblads nachds um zehna wär, wenn die Kinner alle schon im Bett sen und die Frauen scho schloofn.
Und wie der Heiner sei Subber-Idee drin bein Heller derzellt hodd, do woärn alle begeisderd, däss eds fier der älderen Generadion a wos in Schdeedtla getan wern soll. Und dann hodd der Heiner nu gsochd „Do dud mer fei der Oäsch weh, wenn mer sichd, wie die älderen Herrn gecherüber die Kinner in unserer mobilln Gsellschafd benachdeilichd wern!"
Und iech froch mich" is eds der Heiner deswegn a Madscho odder hodd der nedd aa a bissla recht?"
Iä sechd scho Frogn ieber Frogn!
Klaus Bedä