„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also die Gschicht, wu ich eich heit derzell, is amoll widder vo mein Freind Heiner, der wu a echder Frank is. Desmoll geddss obber aa um den Heiner sein Auchenschdernla, der Marchared, die wu eds enddeggd hodd, däss mer in Haushald schboarn muss, wall alles deirer werd.
Der Heiner hodd a Schränkla in sein Schloofzimmer brauchd, wo der sei Underwäsch nei leeng kann.
„Mir kaafn eds des Schrenkla nedd ferdich, sondern in su an Möbel-Subbermargd, wu du des selber zammbaua kannsd, hodd do die Marchared gsochd." Do senn die zwaa dann nei auf Färdd gfoärn, wu su a Möbelfirma is, wu mer alles kaafn kann obber aa selber zammbaua muss.
Dann hodd der Heiner sei Schrenkla kaffd und wie der des derhamm ausbaggd hodd, woärn des zwaa Kardong mit an Hafdn Breddli und a boär Bäggli Schraubn und Dübel. Do is der Heiner färchderli derschroggn, wall bei der Gebrauchsanleidung a Heft derbei woär mit 25 Seidn und 46 Bildli, wu ausgschaud ham, wie a Molbuch für Kinner.
Zererscht hodd si der Heiner bein Ausbaggn vo derer Woär an den Kardong gschniedn, däss sei Finger bludd hodd wie sell Moll der Zinngießers Ludd. Dann hodd der Heiner die Schraubn und Schraibli ausbaggd: 44moll vo der an Sordn, 32 Moll vo der nächsdn, 20 und 24 Moll klennere Schraibli, 38 verschiedene Dübel, 40 klaane Nägeli und nu an Hafdn annere Woär. Vor lauder Schregg hodd doo der Heiner die ganzn Schraibli erschd amoll nundergworfn und dann widder neu sordiert und gfluchd, däss die Marchared gsochd hodd „wenn du su weidermachsd, kummsd du beschdimmd amol nei der Höll!"
Wie der Heiner bein zehndn Bild vo derer Beschreibung woär, hodd des Ganze eher ausgschaud wie a Diesch obber nedd wie Kommodn. Do hodd er gemergt, däss er a boär Leisdli falsch neigschraubt hodd. Do hodd der alles widder rausgschraubd und gschbürd, däss er suwos wie a Sehenscheidenentzündung in rechdn Arm ham muss, wall er nimmer gkennd hodd. Und wie die Marchared gfroochd hodd, ob sie ihn helfn soll, wall er doch ka gscheider Handwerger nedd is, do hodd der Heiner an Schreigrambf grichd und hodd sei Schdernla färchderli beleidichd.
Wie der Heiner dann die Rückwend vo der Kommodn fesd gnacheld hodd, hodd der si nu mit den Hammer gscheid aufn Dauma ghaud, däss der Dauma eds nu blau und schwarz is. Wos der doo derbei gschriea hodd, sooch ich lieber nedd.
Der Heiner hodd dann nu amoll a Leisdn ausgwechseld, wall er die falsch rum eibaud hodd und hodd sie dann ieber die sechs Schubfächer gmachd, wall die ja zu den Objekt ghert ham. Und doo hodd der si gfraid, wall all die Breddli und Schraibli glangd ham und wall bis auf acht Holzdübel, wu er vergessn hodd, niggs übrichbliebn is. Und wie der Heiner noch anderhalb Dooch ferdich woär und gmergt hodd, däss aa die Schubfächer bassn und sich richdi nei und rausschiebn lossn, hodd der Heiner laut gsunga und bfiffn und hodd a Fläschla Seggd aufgmachd, -- obber an der Kommodn hodd der des nedd zamghaud, wecher die Delln, wu des Schränkla sunsd grichd hedd.
Voller Freid is der Heiner dann zu sein Dogder ganga, hodd sein blaua Dauma behandeln und den Unterarm mit derer Endzündung eibindn lossn. Dann is der zur Kurrs Goggers, hodd si an eleggdrischn Schraubndreher gkaffd und gsochd, däss er eds scho a richdicher Heimwerger is, obber nedd waß, ob er nu amoll su a Schrenkla in Färth drin gkaffd und zambaud. Wall des mit derer klann Kommoden war eichendli a „Komödchen".
Und dann hodd der Heiner neer nu gjammerd: „wennsd sichsd, wie schwierich des is, bis mer su a richdicher Heimwerger is, do du dä fei der Oäsch weh!"
Unds ich frooch mich kennerd nedd die Volgshochschull, die VHS, amoll su an Kurs anbieden:"Wie werde ich ein berfeggder Heimwerger, ohne däss ich mich selbst verschdümmel?"
Iä sechd scho: Frogn ieber Frogn!"
Klaus Bedä