„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also die Gschicht, die wu ich eich heit derzell handelt von an freidichn Ereignis. Ich maan eds nett, däss mir Daitschn in Beijing bei der Olymbiade su gut abgschniedn ham.
Des Ereichnis, wu ich maan, is in Herziaura in der Haubdschdrass bassierd. Mei Freind Heiner, wu a echder Frank is, hodd ledsde Wochn goär nimmer ham aus unserer Lieblingswärdschafd von Hellers Hans gwolld.. Nedd däss ir glabbd, däss der Heiner bein Kardeln gwunna hädd, naa der Heiner hodd si ieber den Freibier su arch gfreid, wus bein Heller Hans gebn hodd.
„Freibier is des aanziche Bier, wu ich ka Kopfweh drauf griech und wu ich a boär Maaß verdrooch", hodd der Heiner zu mir und unsere Schdammdischbrieder gsachd und hodd si nu a Seidla eischengn lossn.
Eds muss ich eich obber doch verroodn, warum bein Heller drin am Middwoch su a Subberschdimmung woär. Des woär desderwegn, wall der Hans Großvadder woärn is und an klann Braimasder grichd hodd. „Und doo lässd mer hald an Bubn brunsn ba uns in Frangn", hodd der Heiner gsachd.
Der Wärd, der wu selber neer drei Biggsli, also drei Maadli, zambrachd hodd, hodd si su arch ieber den Bubn gfraid, den wu sei Cornelia, die wu ja aa Braimasderi is, auf der Weld gebrachd hodd. Und wi mir su gfeierd ham, ham si mir nadierli aa über an Nooma für den klann Bubn Gedangn gmachd.
Aaner vo unsere Schdammdischbrieder hodd gmaand „Gambrinus sollerd der Bu haaßn, wall doch des angeblich a Könich woär, wu des Bier derfundn hodd." Obber wall mer dees mid den Wärdshaus verwechsln kennerd, des wu amoll den Wari in der Bambercher Schdrass gherd hodd, ham mir annere Vornama ieberleechd. Der Manni, der wu su arch bibelfest is und aa alle Heilichn kennd hodd dann gmaand, däss mer den Bubn nooch an Heilichn nenner kennerd, der wu wos mit Bier zer doo hodd: Also Laurentius, Augustinus odder Veit. Bei August und Veit ham die masdn den Kopf gschiddeld, obber auf Laurentius , wu suvill hassd wie Lorenz heddn mir uns scho einichn kenna.
Obber wi der Hellers Hans, der wu ja a Ludderischer is und mit die katholischn Vornama nedd su arch vill anfanga kann, nu a Rundn Freibier reidroogn hodd, hodd der uns alla an Korb gebn und hodd gmaand, däss sei Cornelia und ihr Moo Alexander, der wu ja der Vadder vo den Bubn is, scho an Nooma rausgsuchd ham, nemli: der Klaa soll Fabian haaßn.
Do hodd der Manfred gsachd, däss des aa a scheener Nama is und däss der am selbn Dooch Namensdooch hodd wie der heiliche Sebasdian und däss do füär den Bubn dann aa a Lichderbrozession gibd, wu sei Obba Hans jeds Joär widder Freibier schbendiern kann.
Neer mei Freind Heiner is do a weng nachdengli woärn und hodd gsachd „Wenn ihr maand, däss der Hellers Hans jeds Joär Freibier schbendiern dud, do dud mer fei der Oäsch weh!"
Und ich frooch mich: Is denn su a klaaner neier Braimasder nett wergli a Grund, Freibier auszuschengn?
Iä sächd scho, Frogn ieber Frogn!
Klaus Bedä