Herzogenauracher Geschichten 204
„Do dud dä fei deä Oäsch weh!"
Fragen eines nachdenklichen Franken, frei nach B. Brecht
Also die Gschicht, die wu ich heit derzell, is vo mein Freind Heiner, vo den wu ihr eds scho a boär Wochn niggs mer gherd hobbd.
Des woär desderwegn, wall der Heiner hald su a archer Spordfän is. Der Heiner woär in Ösderreich und in der Schweiz ba der Eirobamasderschafd und wall er sie su arch gärcherd hodd, däss mir Deitschn nedd gwunna ham, hodd der Heiner dann sein ganzn Ärcher auf der Kerwa nundergschbülld und hodd uns vo kanne Abenteuer derzälld wu der erlebbd hodd. Obber eds is der Heiner widder efder in unserer Lieblingswärdschafd bein Hellers Hans.
Der Heiner dud si allerwall auf die olymbischen Schbiele in China vorbereiden. Auf hochdeidsch ded mer soogn, der Heiner hodd eds su an chinesischn odder asiadischn Dadsch. Und der woär fei aa scho a Wochn in Beijing, damid der si auf den Olymbia eischdimma kann. Meine Schdammdischbrieder und mir is scho aufgfalln, däss der Heiner eds allerwall su braad lachn dud, däss den seine Augn a weng schlidserd woärn senn und däss der Heiner a ka richdigs „R" mer soogn kann. Schdadds Zigareddn und Oberreichaboch hodd der Heiner eds Zigaleddn und Obelleichenbach gsachd, däss mir scho glabbd ham, der hodd si sugoär neia Zeeh in China machen lossn.
Und dann hodd der Heiner neer nu su gschwärmd vo der chinesischn Kuldur. „Des Essn is ja do driebn su arch gsund", hodd der Heiner gsochd „und aa su bekömmlich, wall wenn mer mit die Schdäbli essn dud, do gedd des vill langsamer und is aa vill bekömmlicher als wenn menn mer mid sein frängischn Beschdegg a Schaifeli mid Kleeß odder drei Scheibn Bressagg odder Graicherds neiwergn dud.
Und mei Marchared die kochd eds neer nu asiadisch in su an besondern Dobf, wu „Wogg" haaßn dud. Do werfd mer alles nei, wos mer essn will und dann kummd a ganz guds Essn raus, su wie a Gullasch bloß nu mera duchanner! Und die Chninesn essn fei wergli alles, was sie bewegn dud, wos fliegn, schwimma odder laafn kann", hodd der Heiner voller Schdolz gsachd.
Obber do is a boär vo unsere Schdammdischbrieder scho ganz schlechd woärn, däss die an Zwetschgerschnabs odder zwaa brauchd ham, wall die dran gedachd ham, däss eds die Chinesn aa Schbinna, Vecheli, Käfer und all su Woär essen. Wie der Heiner su gredt hodd, do ham si mir goär ka Broodwärschd nimmer beschdelln draua, wall der Heiner su arch asiadisch anghauchd gredt hodd. Und auf amoll hodd der a nu su a chinesisch Heilbflanznöl aus seiner Daschn zuugn, wu der bei der Weißn Emmi in Schdeinwech kaffd hodd und hodd uns riechn lossn. „Wenn mer si dees eireibn dud, do gedds an den ganzn Dooch vill besser und do derzu muss mer aa nu chinesische Raicherschdäbli anzindn und su „Fu Weng Übunga" machen, do is dann aa des Kreizweeh wech", hodd unser Chinesn Heiner gschwärmd.
Und wie mir zun Heiner gsachd ham, er soll hald nu a Seidla Bier dringn, do hodd der Heiner gmaand, däss er eds „kein Biel" mer dringn dud, hechsdens nu Dee, wall des doch des chinesische Nadionalgedräng is. Und dann hodd der Heiner neer nu vo Beijing gschwärmd und vo die klann Chinesli, die wu so oarli sen und fasd su gud englisch redn wie der Loddar Matthäus, wie der amoll in Nui Yorg a Inderviuw gebn hodd. Und wie der Heiner ferdich woär mid seiner chinesischn Nachhilfeschdund, do ham mir alle a weng bleed gschaud.
Und dann hodd der Heiner neer nu gsachd „und wennsd du sichsd, wie aggerad sich die Chinesli auf den Olymbia vorbereid ham, mid Bludausdausch, Billn, Hormone und zehn Joär Dräning und sichsd, wie brimidiv mir Deidschn des machen, do dud dä fei deä Oäsch weh!" Und ich frooch mich, is eds des nu Schbord odder is des nedd wie bei die Römer , wu die Bollidigger die Leit neer nu Brod und Schbiele gebn ham und wu kaaner die Goschn hodd aufmachn derfn?
Iä sächd scho, Frogn ieber Frogn!